CARAGA FREELANCER NEWS

MAYOR UG OBISPO GIBALIGYA ?

Kinsa kining maayong laki nga politiko nga usa usab kono ka illegal miner ,illegal logger ug usa usab ka negosyante ?

Sumala pa sa akong mga alipores kining maong politiko relihiyoso nga pagkatawo. Gani man matud pa gihapon sa akong mga alipores nagtoo sila nga higala kini siya sa obispo kay kanunay man kining tawhana maghisgot sa ngalan sa obispo.

Samang higayon lakas pud kono kini siya sa mayor kay kanunay man pud siya maghisgot sa ngalan sa mayor.

Kining tawhana negosyante pud kono kay sa una aduna kini bansohan sa kilid sa suba sa Agusan nga mogabas pud kono sa mga illegal nga kahoy. Gawas sa bansohan nga negosyo nagkahoy- kahoy pud kini siya , ngani matud sa akong alipores nga usa sa iyang mga deliveries sa kahoy padulong sa Cagayan de Oro City nasakote sa mga otoredad apan nakalusot ra usab kay gamit daw niya ang papel sa nga iyaha sa gamhanan nga tawo sa syudad.

Sa milabay nga bulan usa sa tulo ka sadam trak ni politiko nga kargado sa mga kahoy nga matud pa sa akong mga alipores gikan daw sa watershed area nga pinutol gidakop sa laing politiko . Matud pa sa midakop nga politiko nga napuno na siya sa mga reports nga ang iyang kauban nga politiko nalambigit kanunay sa mga kwestiyonable nga transaksyon. Bongga ! Pero mas abtik ug esmarter pa kining iligalista kay nakalusot pa man gihapon sa maigmaton nga pagbantay ang iyang Sadam trak gikan sa mga mata sa task force.

Niining bag-ohay pa lang milutaw na pud ang iyang pangalan sa mina nga operasyon nga usa sa mga gipasanginlan nga maoy hinungdan sa pagkalubog sa ilimnon nga tubig sa dakbayan. Matud pa sa mga lumad nga nahinabi sa mga tigbalita dili nila masagda ang maong politiko sa mga iligal nga transaksyon kay giingnan daw sila nga "OK NA SI MAYOR ANI. OK NA SI BISHOP ! "
Pero ang pangutana sa katawhan karon nakasayod ba kaha sa mga iligal nga transaksyon ni politiko ang mayor ug ang bishop ? Kon nakasayod man sila mangutana usab ug utro ang katawhan motugot kaha sila nga mag iligal kining maong politico ?

Hangtud kanus-a nga pasagdan nila nga magdala sa ilang pangalan kining maong politiko sa iyaha nga mga transaksyong personal ug iligal ?

Asa naba ang delikadesa niining maong sulugo-on sa goberno pagka itom na ba sa iyang kasing-kasing . Matud pa sa akong mga alipores nga maitandi daw ka itom sa Black Mountain nga iyang gimina.

JULY 29 - AUGUST 4, 2009 VOLUME 1 NO: 12 BUTUAN CITY PHILIPPINES