Sunday, August 9, 2009

ANG TINUOD LANG

JULY 15 - 21, 2009 VOLUME 1 NO: 10 BUTUAN CITY PHILIPPINES


Ang tinuod lang kusog mikanat ang taho nga si Dr. Ferdinand Amante na gayud ang modagan pagka Mayor sa atong syudad sa Butuan, ang iyang vice mayor mao si Hon. Councilor Lawrence Fortun, usa ka abogado, ug si Gigil Jimenez pagka Kongresman, usa usab ka abogado nga naparot niadtong miaging pili-ay batok kang Joboy Aquino nga karon mao ang Kongresista sa unang distrito sa Butuan ug Las Nieves. Ang mga katawhan gibati’g kaluya ug kalaay ilabi na gayud kadtong mga botante nga gipol-an na sa administrasyon sa mga Plaza. Dugang pa gayud nga taho nga naka padismaya kay si Kongresista Edelmiro Amante gidid-an sa babaye nga gikatahong minyoan kay gusto sa babaye nga si Edel papahulayon na sa politika. Kini nga mga taho nakahatag kahasol ug pagmahay ilabi na sa mga kapitanes nga mga oposisyon sa mga Plaza kay si Edel Amante ra gayud ang ilang paglaum nga makapukan sa mga Plaza sa dakbayan sa Butuan.
Kining tagsulat nakaila ug nakasinati na gayud ni Cong. Edel Amante sa iyang pamaagi sa politika. Ang tinuod lang si Edel angay gayud nga maminyo pag-usab aron duna siya’y katimbang sa pag-alagad sa katawhan. Ang kagaw sa politika nga anaa kang Edel migimok gayud aron matuman ang iyang tinguha nga moalagad gayud sa Butuan, ang Lungsod nga iyang natawhan. Si Cong. Edel Amante veterano sa politika ug wala mapildi sa natad sa politika sa Agusan del Norte tungod kay kanunay nagtago sa barahang alas sa politika. Bisan pag si Edel modeklara nga siya modagan pagka mayor karon Marso 2010. Mahimo gihapon niya bisan wala siya magparehistro isip botante ug dili siya mo-file sa certificate of candidacy. Ang Kongresman ni Edel mao si Engr. Sergio Pascual ug si Angie Calo ang iyang Vice Mayor, ngani man adunay nagahangyo kanako nga storyahan nako si Engr. Sergio Pascual nga mag Vice Mayor nalang kay si Dongkoy ang padaganon pagka Kongresista batok kang Joboy. Ha! Ha! Ha! Sayang ang kwarta ni Joboy kay tokbon lang sa mga botante! Banat Koy! Wa! Wa! Wa!


- - - - -

JULY 8 - 14, 2009 VOLUME 1 NO; 9 BUTUAN CITY PHILIPPINES

Ang Tinood Lang, ang mga consumador sa Butuan City Water District kanunay nahasul sa kanihit sa tubig ilabi na sayo sa buntag diin daghan ang mogamit niini. Ang hinungdan man gud niini mao ‘Lubog ang tubig sa Taguibo River’ diin maoy tinubdan sa tubig sa Water District. Gamay lang nga ulan modahili dayon ang lapok gikan sa binuldos nga yuta sa may Anticala subay sa San Antonio R.T.R. Road, Agusan del Norte diin nahimutang ang illegal nga pagkubkob sa minang manganese sulod sa watershed nga lugar.

Kini nga illegal nga pagbuhat ug kalsada hinungdan sa kahasol nga natagamtaman sa consumador sa tubig sa Water District karon. Sumala pa sa taho nga gilowatan sa composite team nga maoy nagsusi sa illegal nga kalihokan sa Anticala ngadto sa San Antonio Watershed, nagbutyag nga si Roger Pagtan-aw ug si Erwin Plaza maoy nagdumili pagpasulod sa mga miyembro sa composite team nga gilangkoban sa ENRO, CENRO, NCIP, NEDA, WATER DISTRICT ug sa CCPD ngadto sa lahos sa Brgy. San Antonio.
Ang kalsada sa minahan gayud nakahatag ug dakong kahasol sa mga consumador sa tubig. Kitang mga katawhan gayud motabang sa pagpahunong sa illegal nga nagmina sa watershed aron dili madugangan pa ang kadaut sa mga molupyo sa Syudad! Ako nagatoo nga si Mayor Boy Daku Plaza mohimo gayud ug lakang nga mahunong kini nga illegal nga pagmina.

No comments:

Post a Comment