BISAYA WEEKLY

JULY 8 - 14, 2009 VOLUME 1 NO; 9 BUTUAN CITY PHILIPPINES

Matud ni Col. Zaragoza
‘Nagamit lang ang aking tropa’

Gipahayag sa usa ka taas nga opisyal sa kasundaluhan nga posible’ng nagamit lang ang iyang tropa sa nahitabo nga pagronda sa Presidential Anti-Smuggling Group (PASG) ngadto sa usa ka planta sa plywood bag-ohay pa lang.
Si Col. Cristobal Zaragoza , Battalion Commander sa 30IB Philippine Army miingon nga nagpadala siya ug tropa sa militar sa dihang naghangyo ang PASG ug dugang pwersa gikan sa 30IB alang sa ilang operasyon. “ The army just went there with the presumption of regularity on the request of PASG” pahayag ni Col. Zaragoza pinaagi sa text nganhi sa Caraga Freelancer . “ Posible nga nagamit lang ang akong tropa” , reaksyon usab sa opisyal sa militar sa isyu nga posible’ng maapil sa kaso ang mga sundalo sa 30IB nga kauban sa operasyon. Gidugang pa ni Col. Zaragoza nga dali niyang gimanduan ang iyang tropa nga mobiya sa Emco sa dihang iyang namatikdan nga may problema ang nahisgutang operasyon sa PASG.
Kadumduman nga niadtong petsa 30 sa Hunyo karon nga tuig mga alas 9:00 ang takna sa kagabhi-on kapin kon kulang ang hiniusa nga pwersa sa PASG mironda sa Emco plywood company sa lungsod sa Magallanes, Agusan del Norte.
Sumala sa report ang tropa sa goberno nagdala sa mga tag-as nga kalebre sa armas gibahin sa duha ka grupo mihimo sa pagsulod sa planta agi sa Agusan River samtang ang laing tropa nag atang didto sa entrada nga bahin sa kompaniya.
Gipahayag ni Antonio Tansipik ,General Manager sa Emco nga hilabihan ang kahadlok nga gibati sa ilang mga trabahante sa planta sa dihang misulod ang mga armado ug matud pa mikontrolar sa planta niadtong panahuna. Gidugang usab ni Atty. Patrick Battad , abogado sa Emco nga walay gikapakita nga search warrant ang tropa sa PASG sa dihang misulod sila sa planta. Samtang sa kabahin sa PASG gipahayag ni Director Philip Placer nganhi sa Caraga Freelancer nga dili lang una siya mopagawas ug pahayag kabahin sa isyu hulaton nalang nga magpahigayon sila ug presscon alang sa pagtubag sa tanang mga isyu kabahin sa PASG.

Tulo ka tawong akusado, nasikop

Tulo ka tawong akusado sa lain-laing mga kaso ang nasikop sa kapolisan sa lain-laing dapit sa probinsiya pinaagi sa warrant of arrest kaniadtong milabayng adlaw.
Sumala sa report sa Police Provincial Office (PPO), didto sa barangay Cabangahan, Tago, Surigao del Sur, usa ka Brenda Quenonez, 36 anyos, minyo ug lumulopyo sa abangahan, Tago ang nadakpan sa kapolisan pinaagi sa warrant of arrest nga gi-isyu ni Municipal Trial Circuit Judge Rufo Naragas tungod sa kasong pagpangawat. Si Quinonez adunay gitakdang piyansa nga mokabat sa P10,000 alang sa temporaryong kagawasan gikan sa kustodiya sa kapolisan.
Ikaduhang nasikop sa kapolisan mao si Andres Osiba, 41 anyos, alyas Kapag nagpuyo sa Purok 4, barangay Pamaypayan, Bislig City.
Si Osiba, nag–atubang sa kaso nga pagpanulis ug gi-isyuhan og warrant of arrest ni Regional Tial Court judge Hon. Romeo Buenaflor. Walay Piyansa nga gitakda sa akusado kinsa anaa pa karon gidetenir sa Bislig City Jail.
Sa lungsod sa Cantilan, usa ka Joel Cosminao, 42 anyos, ang nadakpan usab sa kapolisan tungod sa kasong grave threat ug grave maliciuos mischief ug adunay gitakdang piyansa nga P2,000 alang sa temporasryo nga kagawasan.
Ang warrant of arrest giisyu ni Judge Rufo Naragas Municipal Trial Circuit Court sa Carrascal- Cantilan. Ang akusado kasamtangan nga nagtingkagol karon sa Cantilan Municipal Jail.

(WILLY EVANGELIO, Tandag, Surigao del Sur, Bureau Manager)

Oposisyon sa Butuan Gihaylo’ng Motapon sa Administrasyon

Ni: Jocelyn E. Morano, Radyo ng Bayan Butuan

Butuan – Walay pasikaran nga dunay emisaryo gikan sa kampo ni Ampayon Barangay Kapitan Ferdinand Amante nga miduol kang Mayor Democrito D. Plaza aron ihangyo ang pagpasakop sa nila sa kampo sa mga Plaza.
Giklaro ni Konsehal Erwin Dano, nga sukwahi kini nga gipagawas nga estorya gumikan kay mismong ang kampo sa administrasyon ( Mayor Plaza) maoy miduol kanilang anaa sa oposisyon aron kombensihon nga motapon ngadto sa ilang kampo ilabi na karon nga giusa na ang Lakas Kampi ug Lakas CMD.
Ang administrasyon anaa sa partidong Lakas CMD samtang sila si Konsehal Dano, Konsehal Lawrence Fortun ug Barangay Kapitan Amante ang anaa sa Lakas Kampi kauban sa mga politikong Amante sa Agusan del Norte.
Kini nga kabag-ohan sa dagan sa pulitika sa partidong gidapigan puros kang Presidente Gloria Macapagal Arroyo maoy gituhuang rason nga dili na padayonon ang planong atbangan ang mga Plaza sa mga Amante karong umalabot piniliay sa Mayo 2010.
Apan para kang Konsehal Dano, wala pay penal ang tanan ug wala pa usab nagkatigom ang mga oposisyon mahitungod sa himoong laraw alang sa pakigsangka sa malig-ong pwersa sa pamilya Plaza sa umaabot nga eleksiyon.
Sa pagka-karon kusog ang hulungihong, nga si Barangay Kapitan Amante maoy mopapili pagka-Mayor sa Butuan atbang sa kampo Plaza samtang dili na mokandidato pa sa bisan unsang posisyon ang presente nga Kongresista sa ikaduhang distrito sa Agusan del Norte nga si Edilmiro Amante, kinsa unang gidungog nga maoy modagan pagka-Mayor sa Butuan.
Ang kaniadtong naparot sa eleksiyon pagka Mayor sa Butuan nga si Maria Angelica Rosedell Amante ang mobalik paglansad isip kongresista sa Agusan del Norte.
Sa pag-ipon karon sa partidong Lakas CMD ug Kampi, gibutyag ni Konsehal Dano nga mas gustohon pa niyang modagan isip Independente kaysa motapon sa partidong administrasyon sa tinguha nga dili mabulingan ang prinsipyo nga maoy nakapadaog niya isip numero unong konsehal ning dakbayan sa miaging eleksiyon.
Samtang sa nasinati-ang suliran sa panlawas ni Mayor Democrito D. Plaza II, dili layo nga si Daisy B. Plaza ang kapikas ni Mayor Plaza maoy mokandidato pagka-Mayor sa Butuan gumikan sa pag-analisar nga lisod padag-on si Konsehal Randolph Plaza sa pagka-Mayor resulta sa kalisod nga masolod sa unang lima ka ang-ang sa posisyon sa dihang midagan kini pagka-konsehal sa milabay nga eleksyon.