Sunday, August 9, 2009

On Da Rekord

JULY 15 - 21, 2009 VOLUME 1 NO; 10, 2009
NASAYOD BA SI MAYOR PLAZA ?

Sa milabay nga mga bulan si Mayor Democrito “ Boy Daku “ Plaza ll nagkaproblema sa iyang panglawas ug gani sigon sa nahibaw-an sa publiko nga kanunay’ng wala sa City Hall ang alkalde gumikan usab lagi kay nagpatambal kini sa iyang balati-an didto sa kauluhang Maynila . Niining bag-ohay pa lang didto na usab sa dakbayan sa Davao.
Samtang nanglimbasog intawon si Mayor Plaza nga mauli-an sa iyang balati-an aron lig-on nga makapangalagad sa katawhan sa Butuan gidudahan karon nga nangumpas usab kining pipila ka mga oportunista sa iyang palibot . Usa sa mialisngaw na karon mao kanang nahitabo diha sa watershed area sa Butuan City Water District (BCWD) nga ang kinadak-ang luna niini nasakop sa dakbayan sa Butuan. Daghan ang nangutana kon nakasayod ba si Mayor Democrito “ Boy Daku” Plaza ll sa nahitabo sa tubig sa BCWD ?
Tin-aw pa sa akong panumduman kaniadto usa sa mga miting namo sa City Peace and Order Council ( CPOC) diin ako kanhi meymbro niini ug nag representar sa media sector sa Butuan City ngadto sa konseho matud pa ni Mayor Plaza nga ubay ubay na sa mga kawani sa City Hall ang iyang gipahamtangan sa silot sama sa pagsuspenso sa trabaho ug aduna pa usab iyang gitangtang sa serbisyo gumikan kay nasakpan nga nagtinonto sa ilang trabaho. “ Dili ko gusto anang mga tinonto nga trabaho”. Ang maong pahayag ni Mayor Plaza dugay na kadto apan wala gyod to nawala sa akong panumduman. Tungod niadto nga pahayag misamot ka dako ang akong pag-ila ug pagrespeto ngadto sa halangdong mayor.
Kining nahitabo karon nga pagpanamastamas niining mga tawo’ng oportunista nganha sa watershed area sa BCWD diin libo-an ka mga tawo sa dakbayan sa Butuan ang naperwisyo ako nakasiguro nga dili kini ikalipay ni Mayor Plaza.
Sa akong pagtoo kon masayod si Mayor Plaza niini nga tinonto o binu-ang dili siya magpanuko nga mandu-an kining mga tawhana nga undangon na kanang ilang tinonto diha sa bukid sanglit ang mga katawhan sa Butuan ang naapektuhan niini.
Sumala pa usab sa mga reports nga atong nadawat aduna ra ba kuno’y duha ka konsehal nga apil niining mga tinonto diha sa watershed area . Hinoon dili ko gusto mosakay niini nga estorya kay imposible man usab nga moapil sa iligal nga kalihukan ang mga HONORABLES .. Gawas nalang usab tingali kon BAGA NA GYOD NI SILA UG NAWONG. Sumala pa usab sa mga reports nga atong nadawat nga kining mga nag tinonto diha sa watershed area nakaila daw kini sila ni Mayor Plaza . Malagmit mao kini hinungdan nga naghimo sila niining mga tinonto kay LAKAS ang ilang koneksyon ngadto sa atong mayor. Pero ako nagtoo nga wala pa’y husto nga kasayuran si Mayor Plaza niining mga tinonto nga binuhatan dinha sa watershed area . Ako nagtoo nga dili tugutan ni Mayor Plaza nga gub-on niining mga tawhana ang iyang political career nga sa taas nga panahon iyang gi-ampingan..
Ako nagtoo nga kon makasayod si Mayor Plaza sa tinood nga estorya manubag gayud sa iyaha kining mga tawhana nga nag abusar sa iyang pagka maayong tawo.Ako usab nagtoo nga kon momando si Mayor Plaza nga undangon kanang tinonto diha sa watershed area maundang kana sa dali nga panahon. Pinaagi usab niana nga kamanduan ni Mayor Plaza masulbad usab ang problema sa tubig nga halos kada adlaw maoy problema sa katawhan sa dakbayan sa Butuan.. Aduna ako’y pangagpas nga samtang magkadugay nga masulbad ang problema sa tubig mosamot usab kadaghan ang mga tawo nga magkadisgusto sa liderato ni Mayor Plaza. Dako kini nga disbentaha sa politikanhon nga popularidad sa alkalde.
- - - - -


JULY 8 - 14, 2009 VOLUME 1 NO; 9 BUTUAN CITY PHILIPPINES



POLITICAL FUNERAL SA MGA POLITIKO NGA NAGDAUT SA WATERSHED


Diri sa dakbayan sa Butuan halos kada adlaw masinati ang negatibo nga epekto sa gihimong pagpanamastamas sa mga negosyante ug pipila ka politiko nga responsable sa pabuldoze sa karsada sa Brgy. Anticala lahus ngadto sa Brgy. San Antonio, RTR, Agusan del Norte .Apil na ang pagpamutol sa mga dagkong kahoy ug pagmina sa deklarado nga WATERSHED area nga maoy tinubdan sa tubig ilimnon nga gi-develop sa Butuan City Water District .

Kadaghanan sa mga gumagamit sa tubig nagbagolbol tungod sa kahinay sa agas sa ilang gripo. Panahon sa buntag diin kinabag-an sa mga konsumedor sa BCWD ang mogamit ug tubig apan walay moagas sa gripo.Kon aduna ma’y agas hinay kaayo, putol putol ang pag agas ug matud pa sa mga nagreklamo nga kusog pa kuno ang ihi sa amigas. Sa among programa ni Dongkoy sa DXJM Radio nga kada buntag daghan ang mag text ug nag ingon nga na memorize na daw nila ang tanang klase sa pamalikas ug na roll call na pud ang tanang mga bata -bata sa demonyo tungod lang sa kalagot nila nga walay tubig moagas sa ilang gripo.
Sigun pa sa panultihon nga mas maagwanta pa kon kuryente ang mawala dili lang ang tubig..Tinood gyod na siya nga estorya ug dili na kinahanglan nga tagsa-tagsa-on pa nato sa pagpasabot kon unsa ka importante ang kagamitan sa tubig.

Nganong naingon man niini ang serbisyo sa BCWD ?
Ang tinubdan sa tubig sa BCWD anaa nahasulod sa kapin 4,000 ka hektarya nga bukid ug kakahuyan ug gideklarar kini nga watershed area sa panahon pa ni kanhi Presidente Fidel Valdez Ramos .Ang dako nga luna niini nakasulod sa dakbayan sa Butuan apan milapos kini ngadto sa lungsod sa RTR ug Cabadbaran,.Agusan del Norte.

Sumala pa ni Engr. Dodong Sang Tian ,General Manager sa BCWD nagsugod ang kalbaryo sa mga kunsumedor sa tubig sa dihang nag gama ug karsada ang usa ka dakong negosyante gamit ang taming niya ang mga lumad sa maong dapit nga matud pa kakunsabo niya ang pipila ka politiko sa dakbayan sa Butuan. Matud pa ni Engr. Sang Tian nga ang mga suspek ( gitipigan niya ang pagpabutyag sa mga pangalan) mipa buldoze sa kanhi daan nga karsada sa logging company gikan sa Brgy. Anticala ,Butuan City lahus ngadto sa Brgy. San Antonio,RTR, Agusan del Norte. Matud pa ni Engr. Sang Tian nga nagmina ang mga suspek sa nahisgutang dapit . Hinoon , matud pa usab niya nga miangkon ang mga suspek nga nagmina sila apan wala sulod sa watershed area.
Nganong daut ang serbisyo sa BCWD ?
Matud pa ni Engr. Sang Tian nga sa panahon nga mobundak ang kusog nga ulan sa bukid malubog ang suba nga tinubdan sa tubig .Mapugos sila sa pagsira sa gate valve sa BCWD didto sa Brgy. Anticala diin nagtungab ang dakong tubo nga mao ang agi-anan sa tubig padulong sa linya sa kapin 33,000 ka mga kunsumedor sa tubig diri sa dakbayan sa Butuan.

Ang hataas nga karsada nga bag-ong gibuldoze mao ang makapalubog sa suba sa panahon nga mobundak ang ulan kay i-anod sa ulan ang mga lapok padulong ngadto sa Taguibo River nga mao ang tinubdan sa BCWD.
Sumala sa report ang karsada gigamit sa mga responsible aron makaagi ang ilang mga dagkong sakyanan nga nagkarga sa Manganese nga minerales gikan sa San Antonio, RTR diin didto nahamutang ang mina.
Subay sa nahauna nga resulta sa fact finding team nga nag imbistigar sa maong problema ang nahisgutang mina , pagrekonstrak sa karaan nga karsada ug pagpamutol sa mga kahoy walay permiso gikan sa mga ahensya sa goberno nga responsable sa paghimong legal sa ilang operasyon.,

Atangi sa sunod gula sa atong kulum kinsa ang mga politiko nga responsable sa illegal mining, illegal logging ug illegal construction of road nga maoy hinungdan sa kalbaryo sa mga gumagamit sa tubig sa Butuan City. Pasiuna nga pahasubo nato sa kamatayon sa ilang political career. !

No comments:

Post a Comment